Ограничена гаранција од една (1) година на Apple - iOS
Само за производи со брендот на Apple
КАКО ПРАВОТО НА ЗАШТИТА НА ПОТРОШУВАЧИТЕ СЕ ОДНЕСУВА НА ОВАА ГАРАНЦИЈА
ОВАА ГАРАНЦИЈА ВИ ДАВА ОДРЕДЕНИ ПРАВНИ ПРАВА, А ВИЕ МОЖЕ ДА ИМАТЕ И ДРУГИ ПРАВА КОИ СЕ РАЗЛИКУВААТ ОД ДРЖАВА ДО ДРЖАВА (ИЛИ ПОМЕЃУ РАЗЛИЧНИ ЗЕМЈИ ИЛИ ПОКРАИНИ). ОСВЕН КАКО ШТО Е ДОЗВОЛЕНО СО ЗАКОН, APPLE НЕ ГИ ИСКЛУЧУВА, ОГРАНИЧУВА ИЛИ СУСПЕНДИРА ДРУГИТЕ ПРАВА ШТО МОЖЕ ДА ГИ ИМАТЕ, ВКЛУЧУВАЈЌИ ГИ И ПРАВАТА КОИ МОЖЕ ДА ПРОИЗЛЕГУВААТ ПОРАДИ НЕСООБРАЗНОСТ СО ДОГОВОР ЗА КУПОПРОДАЖБА. ЗА ДА ЦЕЛОСНО ГИ РАЗБЕРЕТЕ ВАШИТЕ ПРАВА ТРЕБА ДА ГИ КОНСУЛТИРАТЕ ЗАКОНИТЕ НА ВАШАТА ДРЖАВА, ЗЕМЈА ИЛИ ПОКРАИНА.
ОГРАНИЧУВАЊА НА ГАРАНЦИЈАТА КОИ ПОДЛЕЖАТ НА ПРАВОТО НА ЗАШТИТА НА ПОТРОШУВАЧИТЕ
ДО МЕРАТА ДОЗВОЛЕНА СО ЗАКОН, ОВАА ГАРАНЦИЈА И ПРАВНИТЕ ЛЕКОВИ ПРЕДВИДЕНИ ВО ИСТАТА СЕ ИСКЛУЧИВИ И ГИ ЗАМЕНУВААТ СИТЕ ДРУГИ ГАРАНЦИИ, ПРАВНИ ЛЕКОВИ И УСЛОВИ, БИЛО ДА СЕ ТИЕ УСМЕНИ, ПИШАНИ, ЗАКОНСКИ, ИЗРИЧНИ ИЛИ ПРЕМОЛЧНИ. APPLE СЕ ОГРАДУВА ОД СИТЕ ЗАКОНСКИ И ПРЕМОЛЧНИ ГАРАНЦИИ, ВКЛУЧУВАЈЌИ И, БЕЗ ОГРАНИЧУВАЊЕ, ГАРАНЦИИ ЗА ПОГОДНОСТ ЗА РЕДОВНА УПОТРЕБА И ЗА ПРОМЕТ И ЗА ПОГОДНОСТ ЗА ОСОБЕНА УПОТРЕБА, КАКО И ГАРАНЦИИ ЗА ОТСУСТВО НА СКРИЕНИ ИЛИ ЛАТЕНТНИ НЕДОСТАТОЦИ, ДО МЕРАТА ДОЗВОЛЕНА СО ЗАКОН. ВО МЕРАТА ВО КОЈА APPLE НЕ МОЖЕ ДА СЕ ОГРАДИ ОД ТАКВИТЕ ГАРАНЦИИ, APPLE ГО ОГРАНИЧУВА ВРЕМЕТРАЕЊЕТО НА И ПРАВНИТЕ ЛЕКОВИ ЗА ТАКВИТЕ ГАРАНЦИИ НА ВРЕМЕТРАЕЊЕТО НА ОВАА ИЗРИЧНА ГАРАНЦИЈА И, ПО ИЗБОР НА APPLE, НА УСЛУГИТЕ ЗА ПОПРАВКА И ЗАМЕНА ОПИШАНИ ПОДОЛУ. НЕКОИ ДРЖАВИ (ЗЕМЈИ И ПОКРАИНИ) НЕ ДОЗВОЛУВААТ ОГРАНИЧУВАЊА НА ВРЕМЕТО ЗА КОЕШТО МОЖАТ ДА ВАЖАТ ПРЕМОЛЧНИ ГАРАНЦИИ (ИЛИ УСЛОВИ), ТАКА ШТО ОГРАНИЧУВАЊЕТО НАВЕДЕНО ПОГОРЕ МОЖЕ ДА НЕ СЕ ОДНЕСУВА НА ВАС.
ШТО Е ПОКРИЕНО СО ОВАА ГАРАНЦИЈА?
Apple гарантира дека iPhone, iPad или iPod хардверскиот производ и неговите припадоци кои го носат брендот на Apple содржани во оригиналното пакување („Производот на Apple“) немаат недостатоци во материјалите и изработката при нормална употреба во согласност со објавените упатства на Apple за период од ЕДНА (1) ГОДИНА од датумот на оригиналната купопродажба на мало од страна на купувачот краен корисник („Гарантен Рок“). Објавените упатства на Apple вклучуваат, без ограничување, информации содржани во техничките спецификации, упатствата за употреба и дописите за сервисирање.
Важно: На сите барања истакнати согласно Ограничената гаранција од една година на Apple ќе се применуваат условите предвидени во оваа гаранција.
ШТО НЕ Е ПОКРИЕНО СО ОВАА ГАРАНЦИЈА?
Оваа гаранција не се однесува на какви било хардверски производи или софтвер кои не го носат брендот на Apple, дури и ако се спакувани и се продаваат заедно со хардверот од Apple. Произведувачи, добавувачи или издавачи, кои не се Apple, може да Ви даваат свои гаранции - Ве молиме да ги контактирате нив за дополнителни информации. Софтверот што го дистрибуира Apple, со или без брендот на Apple (вклучувајќи го и, но без ограничување, системскиот софтвер), не е покриен со оваа гаранција. Ве упатуваме на договорот за лиценца којшто го придружува софтверот за повеќе подробности околу Вашите права во поглед на неговото користење. Apple не гарантира дека функционирањето на Производот на Apple ќе биде без прекини или без грешки. Apple не е одговорен за штета што произлегува од непридржувањето до упатствата за користење на Производот на Apple.
Оваа гаранција не се применува: (а) на потрошливи делови, како батерии, или заштитни обвивки кои се дизајнирани да се трошат со тек на време, освен ако нивното нефункционирање се должи на недостаток во материјалите или изработката; (б) на козметичка штета, вклучувајќи и, но без ограничување, гребнатини, вдлабнатини и скршена пластика на портови; (в) на штета причинета од употребата со друг производ; (г) на штета причинета од незгода, злоупотреба, погрешна употреба, контакт со течност, пожар, земјотрес или други екстерни причини; (д) на штета причинета со користење на Производот на Apple спротивно на објавените упатства на Apple; (ѓ) на штета причинета при сервисирање (вклучително и унапредувања и дополнувања) изведено од кој било што не е претставник на Apple или не е Овластен Сервисер на Apple („OСA“); (е) на Производ на Apple што бил модификуван за да се измени функционалност или способност без писмена дозвола од Apple; (ж) на дефекти предизвикани со нормална употреба и абење или со нормално стареење на Производот на Apple или (з) ако каков било сериски број бил отстранет или избришан од Производот на Apple.
ВАЖНО ОГРАНИЧУВАЊЕ НА УСЛУГАТА ЗА iPHONE И iPAD
Apple може да определи сервисирањето за iPhone и iPad по оваа гаранција да се врши само во земјата каде што Apple или неговите Овластени Дистрибутери оригинално го продале Производот на Apple.
ВАШИ ОДГОВОРНОСТИ
ТРЕБА ПОВРЕМЕНО ДА ПРАВИТЕ РЕЗЕРВНИ КОПИИ ОД ИНФОРМАЦИИТЕ СОДРЖАНИ НА МЕДИУМИТЕ ЗА ЧУВАЊЕ ПОДАТОЦИ НА ПРОИЗВОДОТ НА APPLE ЗА ДА ГИ ЗАШТИТИТЕ СОДРЖИНИТЕ И КАКО МЕРКА НА ПРЕТПАЗЛИВОСТ ПРОТИВ МОЖНО НЕФУНКЦИОНИРАЊЕ.
Пред да добиете сервисирање по оваа гаранција, Apple или неговите застапници може да побараат од Вас да доставите доказ за подробностите на купопродажбата, да одговорите на прашања што се осмислени за да помогнат при дијагностицирање на потенцијалните проблеми и да ги следите постапките на Apple за добивање на сервисирање по оваа гаранција. Пред да го доставите Вашиот Производ на Apple за сервисирање по оваа гаранција, треба да имате посебна резервна копија од содржините од неговите медиуми за чување податоци, да ги отстраните сите лични податоци што сакате да ги заштитите и да ги онеспособите сите сигурносни лозинки.
ПРИ СЕРВИСИРАЊЕТО ПО ОВАА ГАРАНЦИЈА СОДРЖИНИТЕ НА МЕДИУМИТЕ ЗА ЧУВАЊЕ ПОДАТОЦИ ЌЕ БИДАТ ИЗБРИШАНИ И РЕФОРМАТИРАНИ. APPLE И НЕГОВИТЕ ЗАСТАПНИЦИ НЕ СЕ ОДГОВОРНИ ЗА КАКВА БИЛО ЗАГУБА НА СОФТВЕРСКИ ПРОГРАМИ, ПОДАТОЦИ ИЛИ ДРУГИ ИНФОРМАЦИИ СОДРЖАНИ НА МЕДИУМИТЕ ЗА ЧУВАЊЕ ПОДАТОЦИ ИЛИ КОЈ БИЛО ДРУГ ДЕЛ ОД ПРОИЗВОДОТ НА APPLE ШТО СЕ СЕРВИСИРА.
По сервисирањето по оваа гаранција, Вашиот Производ на Apple или замена на истиот ќе Ви биде доставена како што Вашиот Производ на Apple бил конфигуриран кога бил првобитно купен, заедно со применливите ажурирања. Apple може да инсталира ажурирања на системскиот софтвер како дел од сервисирањето по оваа гаранција кои ќе оневозможат Производот на Apple да се врати на порана верзија од системскиот софтвер. Апликации на трети страни инсталирани на Производот на Apple може да не бидат компатибилни или да не функционираат со Производот на Apple како резултат на ажурирањето на системскиот софтвер. Вие ќе бидете одговорни за реинсталирање на сите други софтверски програми, податоци и информации. Повратот и реинсталирањето на други софтверски програми, податоци и информации не се покриени со оваа гаранција.
Важно: Не го отворајте Производот на Apple. Отворањето на Производот на Apple може да причини штета која што не е покриена со оваа гаранција. Само Apple или ОСА треба да го сервисираат овој Производ на Apple.
ШТО ЌЕ НАПРАВИ APPLE ВО СЛУЧАЈ НА ПОВРЕДА НА ГАРАНЦИЈАТА?
Доколку за време на Гарантниот рок поднесете валидно барање до Apple или до ОСА, Apple, по свој избор, (i) ќе го поправи Производот на Apple користејќи нови или претходно користени делови кои се рамни на новите во поглед на перформансите и сигурноста, (ii) ќе го замени Производот на Apple со производ кој е барем по функционалноста рамен на Производот на Apple и е составен од нови и/или претходно користени делови кои се рамни на новите во поглед на перформансите и сигурноста, или (iii) во замена за Производот на Apple ќе ја рефундира Вашата куповна цена.
Apple може да побара самите да замените одредени делови или производи кои може да ги инсталираат самите корисници. За заменскиот дел или производ, вклучително и дел што може да го инсталираат самите корисници, којшто бил инсталиран согласно упатствата дадени од Apple, гаранцијата ќе важи за остатокот од Гарантниот рок за Производот на Apple или деведесет (90) дена од денот кога е направена замената или поправката, зависно од тоа што обезбедува подолг период на покриеност за Вас. При замена на производ или дел или при рефундација, секој предмет даден како замена станува Ваша сопственост, а заменетиот предмет станува сопственост на Apple.
КАКО ДА ДОБИЕТЕ СЕРВИСИРАЊЕ ПО ОВАА ГАРАНЦИЈА?
Ве молиме посетете ги и прегледајте ги материјалите за помош објавени на интернет и опишани подолу пред да побарате сервисирање по гаранцијата. Доколку Производот на Apple сè уште не функционира исправно и откако ќе се консултирате со овие материјали, Ве молиме контактирајте ги претставниците на Apple или, доколку има, продавница на мало на Apple („Продавница на Apple“) или ОСА, користејќи ги информациите дадени подолу. Претставник на Apple или ОСА ќе Ви помогне да определите дали Вашиот Производ на Apple треба да се сервисира и, доколку треба, ќе Ве информира како Apple ќе го обезбеди сервисирањето. Кога го контактирате Apple преку телефон, може да се наплаќаат други надоместоци зависно од Вашата локација.
Информации објавени на интернет со подробности за добивање на сервисирање по оваа гаранција се дадени подолу.
ОПЦИИ ЗА СЕРВИСИРАЊЕ ПО ОВАА ГАРАНЦИЈА
Apple ќе обезбеди сервисирање по оваа гаранција преку една или повеќе од следниве опции:
(i) Сервисирање со непосредно поднесување. Можете да го вратите Вашиот Производ на Apple во Продавница на Apple или на локација на ОСА која нуди сервисирање со непосредно поднесување. Сервисирањето ќе се изврши на истата локација, или, пак, Продавницата на Apple или ОСА може да го испрати Вашиот Производ на Apple на локацијата на Сервис на Apple за Поправки („САП“) каде што ќе се сервисира. Штом ќе бидете известени дека сервисирањето е завршено, ќе го подигнете Производот на Apple од Продавницата на Apple или локација на ОСА, или, пак, Производот на Apple ќе ви биде испратен Вам директно на Вашата локација од локацијата на САП.
(ii) Сервисирање со поднесување преку пошта. Доколку Apple утврди дека Вашиот Производ на Apple може да се сервисира со поднесување преку пошта, Apple ќе ви испрати однапред платени товарни листови и, ако е применливо, материјал за пакување, за да можете да го испратите Вашиот Производ на Apple на локацијата на САП или ОСА согласно упатствата од Apple. Штом биде завршено сервисирањето, локацијата на САП или ОСА ќе Ви го вратат Производот на Apple. Apple ќе ги поднесе трошоците за испорака до и од Вашата локација доколку биле следени сите упатства.
(iii) Направи-сам сервисирање на делови. Опцијата Направи-сам сервисирање на делови Ви овозможува самите да го сервисирате својот Производ на Apple. Доколку опцијата Направи-сам сервисирање на делови е достапна во дадените околности, следните постапки ќе се применуваат.
(а) Сервисирање во случај кога Apple бара да се врати заменетиот производ или дел. Apple може да побара овластување за наплата од кредитна картичка како средство за обезбедување за малопродажната цена на заменскиот производ или дел и за применливите трошоци за испорака. Доколку не сте во можност да обезбедите овластување за наплата од кредитна картичка, опцијата направи-сам сервисирање на делови нема да Ви биде достапна и Apple ќе Ви понуди алтернативи аранжмани за сервисирање. Apple ќе Ви испрати заменски производ или дел заедно со упатства за инсталирање, доколку е тоа применливо, како и било какви барања за враќање на заменетиот производ или дел. Доколку се придржувате до упатствата, Apple ќе го поништи овластувањето за наплата од кредитна картичка, така што нема да Ви биде наплатено за производот или делот и за трошоците за испорака до и од Вашата локација. Доколку не го вратите заменетиот производи или дел согласно упатствата или вратите заменет производ или дел којшто не може да се сервисира, Apple ќе го наплати од Вашата кредитна картичка износот за кој има овластување.
(b) Сервисирање во случај кога Apple не бара да се врати заменетиот производ или дел. Apple ќе ви испрати бесплатно заменски производ или дел заедно со упатства за инсталирање, доколку е тоа применливо, како и било какви барања за враќање на заменетиот производ или дел.
(c) Apple не е одговорен за какви било трошоци за работна рака на кои ќе се изложите во врска со примената на опцијата направи-сам сервисирање на делови. Доколку имате потреба од дополнителна помош, контактирајте го Apple на телефонскиот број наведен подолу.
Apple го задржува правото да го смени начинот на кој Apple може да Ви го обезбедува сервисирањето по оваа гаранција, како и можноста за Вашиот Производ на Apple да добива одреден начин на сервисирање. Сервисирањето ќе се ограничи на опциите кои се достапни во земјата во којашто се бара сервисирањето. Опциите за сервисирање, расположливоста на деловите и времето потребно за да Ви се излезе во пресрет може да варираат според земјата. Вие може да бидете одговорни за плаќање на надоместоците за испорака и претовар доколку Производот на Apple не може да се сервисира во земјата во која се наоѓа. Доколку барате сервисирање во земја која не е земјата каде производот бил првобитно купен, ќе ги испочитувате сите применливи закони и прописи за увозот и извозот и ќе бидете одговорни за сите царински давачки, ДДВ и други поврзани даноци и давачки. Онаму каде што е достапно интернационално сервисирање, Apple може да поправи или замени производи или делови со споредливи производи или делови коишто се во согласност со локалните стандарди.
ОГРАНИЧУВАЊЕ НА ОДГОВОРНОСТА
ОСВЕН КАКО ШТО Е ПРЕДВИДЕНО ВО ОВАА ГАРАНЦИЈА И ДО МАКСИМАЛНАТА МЕРА ДОЗВОЛЕНА СО ЗАКОН, APPLE НЕ Е ОДГОВОРЕН ЗА ДИРЕКТНА, ПОСЕБНА, СПОРЕДНА ИЛИ ИНДИРЕКТНА ШТЕТА ШТО РЕЗУЛТИРА ОД КАКВА БИЛО ПОВРЕДА НА ГАРАНЦИЈАТА ИЛИ УСЛОВИТЕ, ИЛИ, СПОРЕД КАКВА БИЛО ПРАВНА ТЕОРИЈА ЗА ШТЕТА, ВКЛУЧИТЕЛНО, НО БЕЗ ОГРАНИЧУВАЊЕ НА: ЗАГУБА НА УПОТРЕБА; ЗАГУБА НА ПРИХОДИ; ЗАГУБА НА ВИСТИНСКА ИЛИ ОЧЕКУВАНА ДОБИВКА (ВКЛУЧИТЕЛНО ЗАГУБА НА ДОБИВКА ОД ДОГОВОРИ); ЗАГУБА НА УПОТРЕБАТА НА ПАРИ; ЗАГУБА НА ОЧЕКУВАНА ЗАШТЕДА; ЗАГУБА НА ДЕЛОВНИ ОДНОСИ; ЗАГУБА НА ПРИЛИКА; ЗАГУБА НА ГУДВИЛ; ЗАГУБА НА РЕПУТАЦИЈА; ЗАГУБА, ОШТЕТУВАЊЕ, КОМПРОМИТИРАЊЕ ИЛИ КОРУМПИРАЊЕ НА ПОДАТОЦИ; ИЛИ КАКВА БИЛО ИНДИРЕКТНА ЗАГУБА ИЛИ ШТЕТА КАКО И ДА Е ПРИЧИНЕТА, ВКЛУЧИТЕЛНО И ЗАМЕНАТА НА ОПРЕМА И ИМОТ, КАКВИ БИЛО ТРОШОЦИ НА ПОВРАТ, ПРОГРАМИРАЊЕ ИЛИ РЕПРОДУЦИРАЊЕ НА КАКВА БИЛО ПРОГРАМА ИЛИ ПОДАТОЦИ ЗАЧУВАНИ НА ИЛИ КОРИСТЕНИ СО ПРОИЗВОДОТ НА APPLE ИЛИ КАКВА БИЛО ПОВРЕДА НА ДОВЕРЛИВОСТА НА ИНФОРМАЦИИ ЗАЧУВАНИ НА ПРОИЗВОДОТ НА APPLE.
ГОРНОТО ОГРАНИЧУВАЊЕ НЕМА ДА СЕ ПРИМЕНУВА НА ОТШТЕТНИ БАРАЊА ВО ВРСКА СО СМРТ ИЛИ ТЕЛЕСНА ПОВРЕДА, ИЛИ НА КАКВА БИЛО ЗАКОНСКА ОДГОВОРНОСТ ЗА СТОРУВАЊА И/ИЛИ ПРОПУШТАЊА НАПРАВЕНИ СО НАМЕРА ИЛИ ОД ГРУБО НЕВНИМАНИЕ. APPLE СЕ ОГРАДУВА ОД КАКВИ БИЛО ИЗЈАВИ ДЕКА ЌЕ МОЖЕ ДА ПОПРАВИ КАКОВ БИЛО ПРОИЗВОД НА APPLE ПОД ОВАА ГАРАНЦИЈА ИЛИ ДА ГО ЗАМЕНИ ПРОИЗВОДОТ НА APPLE БЕЗ РИЗИК ЗА ИЛИ ЗАГУБА НА ИНФОРМАЦИИ ЗАЧУВАНИ НА ПРОИЗВОДОТ НА APPLE.
НЕКОИ ДРЖАВИ (ЗЕМЈИ И ПОКРАИНИ) НЕ ДОЗВОЛУВААТ ИСКЛУЧУВАЊЕ ИЛИ ОГРАНИЧУВАЊЕ НА ОДГОВОРНОСТ ЗА СПОРЕДНИ ИЛИ ИНДИРЕКТНИ ШТЕТИ, ТАКА ШТО ГОРЕНАВЕДЕНОТО ОГРАНИЧУВАЊЕ ИЛИ ИСКЛУЧУВАЊЕ МОЖЕ ДА НЕ СЕ ОДНЕСУВА НА ВАС.
ПРИВАТНОСТ
Apple ќе ги одржува и користи податоците за клиентите во согласност со Политиката на Apple за заштита на приватноста на клиентите којашто е достапна на интернет страницата www.apple.com/legal/warranty/privacy.
ОПШТО
Ниеден препродавач, застапник, или вработен на Apple не е овластен да прави какви било измени, проширувања или дополнувања на оваа гаранција. Доколку некоја одредба од истата се смета за незаконска или неизвршлива, законитоста или извршливоста на останатите одредби нема да биде засегната или осуетена. На оваа гаранција се применува и истата се толкува согласно законите на земјата во која бил купен Производот на Apple. Apple е идентификуван на крајот од овој документ според земјата или регионот во кој бил купен Производот на Apple. Apple или неговиот правен следбеник е гарантот по оваа гаранција.
ИНФОРМАЦИИ ОБЈАВЕНИ НА ИНТЕРНЕТ
Повеќе информации за следново се достапни на интернет:
Информации за меѓународна поддршка
http://www.apple.com/support/country
Овластени дистрибутери
http://support.apple.com/kb/HT1434
Сервиси овластени од Apple
http://support.apple.com/kb/HT1937
http://support.apple.com/kb/HT1434
Продавници на Apple
http://www.apple.com/retail/storelist/
Apple поддршка и сервисирање
http://www.apple.com/support/contact/phone_contacts.html
Apple дополнителна поддршка
http://www.apple.com/support/country/index.html?dest=complimentary
ДОЛЖНИК ПО ГАРАНЦИЈАТА ВО ЗАВИСНОСТ ОД РЕГИОНОТ ИЛИ ЗЕМЈАТА КАДЕ Е КУПЕН ПРОИЗВОДОТ
Европа, Блискиот Исток и Африка
Сите држави
Apple Distribution International
Hollyhill Industrial Estate Hollyhill, Cork, Republic of Ireland
© 2012 Apple Inc. Сите права се задржани. Apple и логото на Apple се трговски марки на Apple Inc., регистрирани во САД и во други земји.
060912 iOS Warranty Macedonian v1.0